【JARvel-knowledge・和牛學-下回】
上次同大家分享過和牛ABC／12345等級背後嘅意義，分別係用數字代表肉質優劣嘅「肉質等級」，同用英文字母代表每隻牛可以切出黎食嘅份量嘅「步留等級」。不過正如我上回所講：「牛學之大，又點只睇幾個數字同字母就可以決定呢？」今次同大家黎個《和牛學進階版》！
進階版第一堂，又係學吓詞語定義嘅時間。我地去超級市場買牛肉果陣，經常會見到「和牛」同「国産牛」呢兩個字，大家可能會覺得國產，唔係就係日本當地出產咩？和牛唔係就係日本牛咩？兩者分別應該唔大掛？答案，係有分別㗎！
先講講国産牛（こくさんぎゅう）。佢嘅定義是係：喺呢隻牛嘅「牛生」當中，佢喺日本生活得最耐。換句話講，一隻喺外國出世住咗幾年，然後再運去日本養多十幾年先劏嘅牛，都係叫做國產牛。因為佢喺日本生活嘅時間比喺外國耐。當然，喺日本出生、日本長大、再喺家鄉被劏嘅，毫無懸念一定係國產牛。至於和牛，其實細分嘅話係分為四大種: 包括大家最熟悉嘅黑毛和牛、褐毛和牛、短角和牛、仲有最少數量嘅無角和牛。能夠被冠以和牛嘅稱號，係同牛嘅品種以及血統有關。不過就算係「和牛」，都唔一定矜貴㗎！真係高級嘅，係要符合好多項關於飼養同肉質嚴格標準嘅「品牌牛」(ブランド牛)。
我們熟悉嘅神戶牛、松阪牛、近江牛同米澤牛都係品牌牛，佢地亦係鼎鼎大名嘅「日本三大和牛」。冇錯！相信大家已經發現到，明明係三大和牛，點解我會數咗四款出嚟㗎呢？答案係..............因為對於日本三大和牛嘅講法有好幾個：神戶牛同松阪牛係鐵膽，而第三款，有人話係近江牛、亦有人話係米澤牛。鑑於日本人唔鍾意爭吵、唔傷和氣嘅精神，最後就演變成：「打～～～～～和！」四款都係日本三大和牛！不過到底三唔三大，我覺得其實都唔係最重要。因為日本每年都有大大小小嘅國產牛、和牛、品牌牛選舉，每年都有好多冠軍誕生。好似之前嘅全日本和牛大賽中，九州嘅宮崎牛就再次奪得冠軍喇！所以計我話，唔使理排名果啲虛名嘅，啱自己口味嘅就係好牛啦！
下次有機會嘅話，再分享吓一啲啱我口味嘅「好牛」啦～
#JARvelogue
#搵配圖真係好殘忍
#因為要返睇晒我食過嘅牛再揀
#呢張睇到人真係好想食すき焼き
Search